МЭНДЧИЛГЭЭ

Дэлгэр Монгол орныхоо өнцөг булан бүрт гэрэл гэгээ бадраах эрхэм үйлсийн эзэд болсон салбарын болон компанийн хамт олон үе үеийн ажилтан албан хаагчид, хамтран ажиллагч байгууллагууддаа айлчлан ирж буй шинэ оны мэндийг өргөн дэвшүүлье.

Өнгөрөн одож буй 2022 онд цахилгаан эрчим хүчийг тасралтгүй, найдвартай дамжуулах амин үүргээ нэр төртэй биелүүлж, 55 жилийн түүх бичсэн дамжуулах сүлжээний хамт олон ололт амжилтаар дүүрэн байлаа. “Цахилгаан дамжуулах үндэсний сүлжээ” ТӨХК энэ онд хийсэн шилдэг ажлуудыг дурьдвал:

• Дархан дэд станцын 220 кВ-ын 63 МВА чадалтай АТ-1 трансформаторын бүрэн хэмжээний задаргаат их засварын ажлыг компанийн дотоод нөөц бололцоо, боловсон хүчинд тулгуурлан анх удаа бие даан хийж гүйцэтгэлээ.
• 110/35/10 кВ-ын Дарь-Эх дэд станцын 35 кВ талын  ачааллыг хөнгөлөх зорилгоор 35 кВ-ын Яргайт-А,Б АШ-ын трассыг өөрчлөн,  Сэлбэ дэд станцад шилжүүлэх ажлын техникийн шийдлийг гаргаж амжилттай зохион байгуулснаас гадна 110 кВ-ын Өндөрхаан АШ-ын 12 км утас сольж, ЦДАШ-ын ашиглалтын түвшинг дээшлүүлсэн.
• 220/110/35 кВ-ын Сонгино, Мандал дэд станцуудыг холбосон 213,214-р АШ-уудад ОАПВ-г оруулж өгснөөр системийн хэмжээнд тасралт саатал болон савлалтын үед найдвартай ажиллах нөхцөл бүрдсэн.
• 220/110 кВ-ын ИХБ-4, 110/35/6 кВ-ын ИХБ-3, 220/110/35 кВ-ын Улаанбаатар, Дорнод-2, 110/35/10 кВ-ын Туул, Хүрхрээ, Налайх дэд станцуудын бүх реле хамгаалалт, автоматикийн төхөөрөмжүүдийг нэг синхрон цагийн системд холбосноор тасралт саатал болон аваарийн үеийн бичлэг авч, дүгнэлт гаргаж мэдээлэл солилцоход хялбар боллоо.
• Монгол улсын экспортын чиглэлийн төмөр замын томоохон бүтээн байгуулалт болох Тавантолгой-Зүүнбаян чиглэлийн төмөр замын төслийн хүрээнд 220/110/35 кВ-ын Тавантолгой дэд станцын 35 кВ-ын хуваарилах байгууламжийг 2 ячейкээр, 220/22/35 кВ-ын Цагаансуварга дэд станцын 22 кВ-ын хуваарилах байгууламжийг 2 ячейкээр тус тус өргөтгөх, 22/35 кВ-ын 2х1,6 мВА хүчний трансформатор, 35 кВ-ын 8 ячейк бүхий хаалттай хуваарилах байгууламжийг барьж ашиглалтад оруулах зэрэг ажлыг амжилттай гүйцэтгэлээ.
• 35 кВ-н Гурвансайхан, Төв, 35 кВ-н Луус, Олгойнговийн АШ-уудыг 220/110/35 кВ-н Мандал дэд станцад шилжүүлэх ажил бүрэн хийгдлээ. Мөн 35 кВ-н Төв АШ-ын шилэн кабель бүхий аянгын троссны холболт, оффис болон  Мандал дэд станцыг холбосон интернэтийн урсгалын тасралтгүй найдвартай ажиллагааг хангалаа.
• Төвийн бүсийн салбарын оффист дээр сервер бүхий алсын удирдлагын хяналт мэдээллийн программыг ажиллагаанд оруулж, салбарын хэмжээнд дэд станцуудыг алсаас удирдах, хянах систем нэвтрүүлсэн.

- 110 кВ-ын Хархорин АШ-д шувуу үргээгч суурилуулах, аэродинамик тусгаарлагчаар   солих ажлуудыг гүйцэтгэснээр шугам тоноглолын найдвартай ажиллагаа дээшилсэн.

- Түлш эрчим хүчний улсын албаны гамшгийн үед ашиглах тоон системийн радио холбоог Улаанбаатар хотын орчимд ашиглах зориулалттайгаар шинээр суурилуулан холбосон. Тус холбоог ЭХЯ, УБЦТС ТӨХК, ЦДҮС ТӨХК компаниуд одоогийн байдлаар ашиглаж байна.

   Өнгөрөн одож буй 2022 онд манай компанийн хувьд гадаад дотоод харилцаагаа өргөжүүлж, үйлчлэх хүрээгээ тэлэх хөгжлийн бодлогод ач холбогдол өгсөн жил байв. Тухайлбал, Монгол Улсын нэгдсэн сүлжээнээс “Оюутолгой” уурхайг цахилгаанаар хангах гэрээ болон “Сэргээгдэх эрчим хүчний оролцоо ихтэй эрчим хүчний системийн тогтвортой байдлыг нэмэгдүүлэх, чадавхыг бэхжүүлэх төсөл”-ийн хамтын ажиллагааны санамж бичигт гарын үсэг зурлаа. Мөн Монгол Улсын Засгийн газраас хэрэгжүүлж байгаа “Шинэ сэргэлтийн бодлого”-ын хүрээнд Эрчим хүчний салбарт хийгдэх томоохон ажлуудын нэг болох эрчим хүчний сүлжээнд ашиглах том чадлын хуримтлуурыг 2023 оны өвлийн оргил ачааллаас өмнө ашиглалтад оруулахад хамтран ажиллах гэрээг үзэглэсэн.

Дамжуулах сүлжээний бат бэх шугам болсон хамт олондоо айлчлан ирж буй шинэ ондоо эрүүл энх, саруул сайхан байж, ажил хөдөлмөрийн талбарт гавъяа алдраа дуурсгаж, компанийхаа нэр алдрыг өндөрт өргөж явахыг ерөөе!

                    Монгол улсын гал голомт машид бадран, ашид гэрэлтэх болтугай.

ЦАХИЛГААН ДАМЖУУЛАХ ҮНДЭСНИЙ СҮЛЖЭЭ ТӨХК-ИЙН ГҮЙЦЭТГЭХ ЗАХИРЛЫН АЛБАН ҮҮРГИЙГ ТҮР ОРЛОН ГҮЙЦЭТГЭГЧ Б.ДАШДАВАА